İlin saç kəsimləri maksimal dərəcədə sadə və təbii olmalıdır. Həm də müasir kəsimlər düzləşdirmə zamanı çox vaxt və müxtəlif staylinq vasitələri tələb etməməlidir. 2011-ci ilin dəbində daha çox uzun saçlara üstünlük verilir. Mövsümün favoriti uzun saçlar olsa da, qısa və orta uzunluqda saçlar da aktualdır. Həmçinin kaskad kəsimlər, asimmetriya və təbii rənglər də dəbdədir. 
 Düz saçlara sahib olan xanımlar təpədən başlayaraq qalın, hamar, əyri tel kəsdirə bilərlər. Telsiz də saxlamaq olar. Uzun saçları ya açıq saxlaya, ya da təpədə düyün və ya aşağı hissədən "at quyruğu" formasında yığa bilərsiniz. Dəbdə olan retro-üslubda saç düzümü üçün yuxarını naços edin, aşağını isə açıq saxlayın. Eyni uzunluqda olan uzun saçlar ortadan ayrılmalı və kökdən bir az həcmli olmalıdır ki, buna da naços vasitəsilə nail ola bilərsiniz. Belə saçları, adətən açıq saxlayırlar. Buruq saçlara düz, asimmetrik tel yaxşı yaraşır.

Orta uzunluq Bu mövsüm orta uzunluqda buruq və düz saçları kare formasında kəsirlər. Kare həcmli, üzün formasını təkrarlayan, çiyinə və boğaza qədər, düz və dalğavari, asimmetrik, düz və əyri telli ola bilər. Ən dəbli forma uzun əyri telin üzün yarısını bağlamasıdır. Orta uzunluqda saç ya klassik kare şəklində, ya retro stildə dalğavari, ya da başda qarışıq formada düzəldilir.

Qısa saçlar 2011-ci ilin ən dəbli qısa saç kəsimi bobdur. Müasir bob həcmli və ya hamar, klassik və ya asimmetrik ola bilər. Ötən ildən fərqli olaraq bob dağınıq telli, qeyri-dəqiq tağlıdır. Uzun telli paj da yeni ilin ən dəbli kəsimlərindəndir. O, əsasən düz saçlarda gözəl görünür. Ən uyğun rəng isə qaradır. Başqa rənglərlə də eksperiment etmək olar.